Su toppu e s’imbriacolu.

 

Unu toppu e unu ibriacolu cada santu borta e die issiana a si fachere una passizada in bia majore. A ora de sas chimbe addoppabana in ponteferru e toppica toppica s’unu e chircande de si biere sa punta de sos pedes s’atteru, arribbabana a sa pratta de Santu Jubanne. Si firmabana carchi minuttu a zarrare e torrabana a caminare.

 

Su toppu, chi caminabata in palas, dabata cada tantu unu corfu de bacculu a s’imbriacolu pro chircare de l’adderettare ma de adderettare s’imbriacolu non de cheriata ischire garrigu de amarettos de Saronno e abbardentedas dae manzanu chitto. Issu issiata cada manzanu a li comporare su zornale a sa mama: andabata a su chiosco de Collari in ponteferru, comporabata su zornale e fachiata tappa i su zilleri de su Cinesu a si bibere unu caffè chene cuzzirinu.

 

Cando risissiata a ghirare a dommo sua fini prontas pro issire sas notissias de s’incrasa. Su toppu, biudu dae carchi annetto, fiti unu bravu tunicadore e una die, tunicande unu solaiu supra de duos taulones male fraganaos, perdende s’equilibriu rubete secandesì s’ossu de su raiolu.

 

Simbriacolu fiti un omine bonaccione, bravu mastrimuru, ma sas malas cumpannia e sa tentassione de su bumbu l’aina fattu perdere su trabballu e risissiata a tirare adainnantis chin sa pensionedda de sa mama.

 

Sos duos cumpanzos andabana de amore e de accordu, e cando s’imbriacolu fiti in cumpannia de su toppu non li colabata mancu i s’anticamera de sa conca de intrare a su zilleri, nè a cumbidare, ca fiti ispiantau, e prus pacu a si fachere cumbidare. Su toppu connoschiata meda bene s’imbriacolu, pro parizzos annos aiana trabballu paris i sa mattesi impresa e ischiata comente lu piccare. Cando capitabata de lu biere tristu ca maccari sa mama no istabata bene l’accasazabata, e chin d’una barzelletta risissiata a li fachere torrare su bonumore.

 

Simbrialocu fiti finzas unu credente: cada manzau, prima de s’icchepesare, nabata a boche arta su rosariu e cadannu non podiata mancare nè a sa nobena de sas Grassias e galu prus pacu a cussa de su Serbadore.

 

Unu sero, s’iberru fiti intaru chene aere mancu toccheddau sa janna, appustis de aere saludau su cumpanzu toppu, s’imbriacolu s’accatata indainantis duas pessones, un omine e una femina, Chene l’aere mai bidu e connottu lu firmana e si presentana: “Piachere nois nor muttimus Bobore e Grassia e semmus chircande reparu in carchi dommo pro custa notte. Nos ischiese narrere prupriachere aube podimmus andare?”

 

S’imbriacolu, comente esserete cussizau dae calicunu, rispondete: “Si cheriese e bos fachete piachere podiese bennere a dommo mea. Deo isto chi mama e unu cantu de concone e unu lettu inube bos sistemare l’accattammus”.

 

Bobore e Grassia azzettande chin piachere s’ospitalidade de s’imbriacolu dezzidini de li fachere unu donu: tres rosarios d’oro. S’incrasa, appustis de aere saludaos sos ospites, andata a comporare su zornale a sa mama ma s’abbizata chi s’esigenzia de andare a si bibere su caffe chene cuzzirinu este isparia.

 

Dezziditi de andare a toccheddare a dommo de su cumpanzu e appustis de s’errete bibiu su caffè li contata cantu suzzessu su sero prima donandendelì unu de sos tres rosarios rizzivios dae sos duos istranzos. S’imbriacolu dezziditi dae sa die de cambiare passu a s’esistenzia e a su toppu de sanare dae una rutta chi pro medas annos l’aiata trumentau.

 .