Una bida mai cherfia.

Nicolina piliruia fiti una femina abbarrada biuda appustis de aere colau bintichinb’annos coiubada chin d’un omine connottu in dommo sua e aere appiu duos zemellos, Zoseppe e Zommaria. Gemellos chi, maccari cherendesi bene aiana caratteres diversos. Zoseppe fiti tranquillone, semper de bonumore chi si fachiata a cantos pro azzudare sa familia e chie n’aiata bisonzu.

Zommaria fiti burberu, chin su sambene sempere achedau e gai mandrone chi non si che dobabata su prattu dae sa mesa, appustis de aere manicau. Sa mama su mazanu li juchiata su caffè a su lettu e cando risissiata a s’ichepesare falabata a sa cuchina rustica e si bibiata una paia de zicchettes.

Istabana in d’una dommo de tres pianos: i su pianu terra una bella cuchina rustica chin d’una ziminera manna e unu furru inube, sas teraccas, cuchianabana su pane carasau, sas casadinas e sos pistoccos. I su primu pianu duos apposentos e unu bagnu. In artu e tottus unu sostre istau dae cropos de sartizas, formas de casu e pancettas.

Nicolina piliruia fiti una bella femina, chi, custrinta dae su babbu e sa mama, aiata deppiu coiubare un omine prur mannu de issa de bint’annos, Luiseddu, abbocau conottu e istimau, amicu de su babbu, prenu de deppidoso dae pedes a conca. Luiseddu trattabata sa muzere comente una reina maccari esserete semper ischiu chi issa fiti istada custrinta a lu coibare.

Nicolina, maccari sa naschida de duos fizos, non fi mai risissia a provare amore pro su maridu. Sa differenzia de edade l’ispinghiata a la pessare in manera differente ma galu peius fiti su rancore pro su babbu, sempere assente (colabata meda tempus in presone e pacu in dommo sua) e chi l’aita custrinta a si coiubare chin d’un omine istudiau e chi l’aiata sarbau parizzas bortas dae una cundanna longa.

Nicolina piliruia non risissinde e galu prus pacu chircande s’amore pro su maridu si bidiata a fura chin d’un atteru omine, cunzaresu, fedale suo chi zirabata in Nugoro chin d’una mottichedda a duas rodas e una taschedda. Issu issiata cada manzanu chitto zirandesi sos cunzaos pro si tabballare sa zorronada.

Che lu bidiana in cada punta de loccu semper chin sos pilos male conzos ma una carnagione chi lu fachiata assimizare a unu zovanu de bint’annos. Nicolina piliruia fachiata de tottu pro non fachere ischire nudda ne a su maridu, chi si l’aita fracada, ne a sos fizos. Una die Zommaria intrata a su zilleri chin d’una troppa de cumpanzos pro fachere festa in onore de sa naschida de sa fiza de uno de issos. Zarrande e isbirrettande beniti a ischire chi sa mama, dae parizzos annos, ammorabata chin d’un omine chi l’inghiriabata dae cando fiti zovanedda.

Chin su sambene achedau dae sa naschida, ammisturau a sas parizzas tassas de birra bibias, dezziditi de si presentare indainnantis de sa mama pro chircare de ottenere risposta de cussu chi fiti benniu a ischire. Nicolina piliruia chin sa cara c’aita piccau su colore de sos pilos e chircande de calmare su fizu nechidau, ammittiti de si biere dae parizzos annos chin d’unu omine chi aita connotto dae cando fini paris in iscola.

Fachete ischire a su fizu chi issa si fiti coiubada chin su babbu ca custrinta dae su jaiu e sa jaja. Zommaria meda ligau a su babbu, appustis de aere faveddau chi su frade dezziditi de andare a chircare s’amante de sa mama e chin d’unu farchione lu minettata de non si torrare a accurziare a sa mama. Appustis de carchi mese dae sa morte de su babbu Zoseppe accattata una littera in palas de una fotografia, e leghendela abbarrata a bucca aperta.

Beniti a ischire chi issu ischiata chi sa muzere, semper trattada che una Reina, amada e rispettada maccari issa no esserete provau su mattessi sentimentu, si bidiata dae parizzos annos chin d’unu atteru omine e de non provare rancore ne pro issu e galu prus pacu pro issa ca l’aita dau sa grassia de lu fachere diventare babbu de duos bellos zemellos ma, maladiu dae tempus e cubande tottu a tottusu, aita dezzisu de sichire sos frades mortos in gherra.

Zoseppe appustis de aere lettu tottu sa littera, chene si fachere biere dae nemmos e pranghende che creattura, dezziditi de la brusiare cubande tottu a sa mama e a su frade, abbarraos sempere cumbintos chi issu fiti mortu pro curpa de sos problemas chi aiata a su coro.

Nicolina piliruia assustrada e timente no esserete suzzessu carchi cosa a s’amante pro curpa de su fizu Zommaria, dezziditi de sacrificare un’attera borta sa propria bida colande su restu de sos annos in tristura maccari mama de duos zemellos.