Sa boche de s’innossensia

 

Liandru e Mariane fini duos ergastolanos fughios dae presone chi dezzidini de andare a bandidare i sos montes de sa Barbagia. Liandru fiti ulianesu, cundannau a s’ergastulu ca imputau de su sequestru e sa morte de unu possidente nugoresu. Artu che unu tappu de ampulla, aita un’agilidade chi fachiata barba e pilos a sos prur mannos de issu. Coiubau e babbu de duos fizos, mandabata parizzas litteras a sa muzere, iscrivende sempere chi fiti innozente e chi nemmos lu crediata.

Mariane fiti de razza orgolesa ma naschiu e paschiu in Nugoro. Artu e istrizzileddu, risissiata a biere una musca chi si moghiata a deche metros de distanzia. Finzas issu cundannau a s’ergastlulu aiata azzettau de mala gana sa cundanna arribbada pro aere isparau e mortu duos carabbineris i sos montes de Lula. Mariane fiti coiubau e appustis iscropau chin d’una pizzocca urunesa connotta, parizzos annos prima, in d’unu coiubiu de unu ghermanu.

Liandru e Mariane s’accattana i sa mattessi zella chin atteros duos presoneris casteddaios chi chircabana in cada manera de li fachere sa furca. Sa zella fiti gai minore chi cando cascabana o isturridabana sos muros cambiabana colore. Istraccos de aere colau ambarduos decannos aggoraos, chene fachere cumprendere nudda a sos castededdaios, pessana a comente fughire dae una presone bezza e chin pacas guardias a los controllare. Sa bentana de sa zella s’affazzabata a su caminu prinzipale e risissire a fughire de sa bentana appustis de aere secau s’ifferriada fiti unu jocu. Una notte chene si fachere abbizare dae sos duos cumpanzos, Liandru e Mariane fughini e a pede, furande bestires impiccaos in d’una bentana, arribbana a sos montes de Orgosolo. Leandru, semper prus cumbintu de essere innozente, iscrivete atteras litteras a sa muzere chi risissiata a leghere iffundendelasa chin sas lacrimas de s’amore e de tristura, e cando capitabata de faveddare chin Mariane, pentindesi pro essere fughiu dae sa presone, lu piccata a malas paragulas minettande de l’ucchidere. Ambarduos colana sa latitanzia mai moghendesì dae su mattessi loccu, furande carchi bestia pro si cazzare sa gana.

Istraccu de sa bida de latitante e semper prus cumbintu de essere innozente Leandru dezziditi de si presentare i sa caserma de sos carabineris accatttande i foras sa muzere e chin sos ocros garrigos de lacrimas l’abbrazzata.

Pro meritu de unu bravu abbocau sa cundanna de Liandru beniti annullada torrande a s’omine una libertade isperada finzas a sa fine. Mariane, omine burberu e prepotente accattata sa morte rughende dae unu costone i sos mattesi montes chi l’aiana ospitau, ma a su mattesi tempus cundannau a una sorte iscritta in d’unu libru de unu destinu fattu non de paginas biancas ma pintasas a ruiu.