Porrogu

 

Su porrogu de custu libru fattu de contos chi ispero andezasa a leghere chin piachere e passione, ponende a banda pro carchi ora tottu sos pessamentos, naschiti in manera differente, chin d’una poesia appassionada ca su destinu ha cherfiu chi issu esserete bidu la luche de sa prubbricassione appustis de sa morte de mama.

Naschiti ispintu dae s’amore e dae sos bonos prinzipios chi issa paris chin su biadu de babbu m’ana imparau, e dae sa passione pro s’iscrittura e su limbazu sardu, ammentande unu tempus colau ca soe cumbintu chi solu ammentande sos tempos colaos si resessiti a aprezziare cussos presentes.

Mama mea istimada custu libru ti soe dedicande chin sas lacrimas chi mi falana in cara ca tue appustis de aere gherrau chin d’una maladia isfidiada chi si muttiti Alzheimer ti che sese andada. Nos ar lassau unu sero de attonzu i su mese de Sant’Andria istracca comente fisi de gherrare chin d’una maladia chi non t’ha bidu mai doma, precande cada die sos Santos de su paradisu pro chi a sos atteros esserene donau unu sorrisu.

Sos contos c’appo iscrittu chin passione a tibe los appo semper lettos e tue, ascurtandemì chin attenzione, sa manu in cara mi colabasa chin passione.

Custos contos naschios sunu pro meritu de sa cumpanza mea Fantasia e ammentande sos bellos tempos colaos in pizzinnia pro meritu de unu bichinau, Santu Emilianu, chi no appo mai irmenticau e cussu de Seuna chi a sa familia nostra, sor de Camellu, sos Nadales ha dau.